Quebec at Canada mamumuhunan ng halos $100 milyon sa pagpapalawak ng IBM

Nais ng gobyerno na gawing world leader ang Canada sa paggawa ng semiconductor at lumikha ng 280 highly skilled jobs at 240 trainee positions sa quantum technology. Ang IBM Bromont ay may halos isang libong manggagawa.

Umaasa ang Canada, sa pamamagitan ng proyektong ito, na mapataas ang produksyon ng mga semiconductor at pasiglahin ang paglago ng ekonomiya.

"Tiyak na ang pondo na ito ay susuportahan ang pananaliksik sa quantum technology, magdaragdag ng bagong kapasidad sa pagma-manufacture sa mga pasilidad ng packaging ng semiconductor ng IBM Canada sa Bromont at, higit sa lahat, palalakasin ang semiconductor supply chain ng bansa," sinabi ng Prime Minister's Office.

Ang dalawang antas ng pamahalaan ay inanunsyo ang investment na nagkakahalaga ng $98.8 milyon, kabilang ang $59.9 milyon mula sa Canada sa pamamagitan ng Strategic Innovation Fund at $38.9 milyon mula sa Quebec.

Kasama sa bahagi ng probinsyal na gobyerno ang forgivable loan na $32 milyon para sa bagong equipment para sa semiconductor circuit packaging at isang $7 milyon na loan mula sa programa ng ESSOR para sa pag-automate ng linya ng packaging para sa mga switch na inilaan para sa sektor ng telekomunikasyon.

Ang bahagi ng pera ay mapupunta sa Collaboration Center MiQro Innovation (C2MI), kung saan nakikipagtulungan ang IBM sa pananaliksik at pagpapaunlad para sa quantum technology.

Bahagi ng artikulo ni Nicolas Bourcier, Radio Canada International na isinalin sa Tagalog ni Catherine Dona.